“කියුබාව සැබවින්ම ප්‍රාතිහාර්යයක් වන අතර එය ආරක්ෂා කිරීම වටී. මෙතරම් සම්බාධක තිබියදීත් කියුබානුවන් මෙතරම් ශක්තිමත්ව සිටී නම්, සම්බාධක නොමැති තත්වයක් තුළ ඔවුන් කෙතරම් ජයග්‍රහණ තම සමාජයට අත්කර දේවිද යන්න කෙනෙකුට සිතාගත හැක.” යැයි එංගලන්තයේ කොමියුනිස්ට් පක්ෂයේ Morning Star ලිපියක් පලරමින් සඳහන් කරයි…
එම පුවත්පතේ පලවූ එම ලිපියේ සිංහල අනුවාදනය පහතින් පල වේ.
ජුලි 11 වන ඉරිදා කියුබාවේ විදුලි කප්පාදුවට හා ආහාර අවුෂද හිඟයට එරෙහිව වීදි විරෝධතා ගණනාවක්ම සිදුවිය.
මෙම විරෝධතා ජාත්‍යන්තර ප්‍රධාන ධාරාවේ මාධ්‍ය හරහා පුළුල් ලෙස වාර්තා වූ අතර, BBC ඇතුළු රූපවාහිනී ජාලයන්හි දවස පුරා ප්‍රවෘත්ති වාර්තා පළ විය.
මෙම විරෝධතාවලට මූලික වස්තු බීජය වූයේ පීඩිත කියුබානු ජනතාවගේ නිදහස සඳහා වූ කැඳවීමක් බව ව්‍යාජ වාර්තා පළවිය..
ප්‍රවෘත්ති වාර්තා සහ සමාජ මාධ්‍ය පෝස්ට් එක්සත් ජනපදයේ අරමුදල්වලින් යැපෙන සාවද්‍ය තොරතුරුවලින් පිරී ඇති අතර විශ්වාස කළ නොහැකි තරමේ ඡායාරූප සහ වෙනත් සාක්ෂි ව්‍යාජ ලෙස ප්‍රකාශ කිරීම් දැකිය හැක.
කියුබන් භූමියේ ඇති මේ හිගතාවයන්වල බලපෑම නිසැකවම දැඩි වී ඇති අතර මේ අවස්ථාවේ කියුබානු ජනතාවගේ දෛනික ජීවිතය අතිශය දුෂ්කරය.
ආහාර ද්‍රව්‍ය සඳහා දිනපතා පෝලිම් තිබේ. වැඩි වැඩියෙන් විදුලිය ඇනහිටීම් සිදුවී ඇති අතර වෛද්‍ය සැපයුම් පිළිබඳව පවා ප්‍රශ්න සහගත තත්වයන් ඇති වී තිබේ. ඊට අමතරව, මෑත සතිවල කෝවිඩ් – 19 සංඛ්‍යා දත්තද විශාල වශයෙන් ඉහළ ගොස් තිබේ. ඒ නිසා විරෝධතාකරුවන්ගෙන් අතිමහත් බහුතරයකට තමන්ගේ විරෝදතාවලට සාදනීය හේතුන් බොහොමයක් ඇත.
කෙසේ වෙතත්, මෙම ගැටලුවලට මූලික හේතුව පිළිබඳව අප පැහැදිලි අවබෝදායක සිටීම ඉතා වැදගත්ය. කියුබාවේ පවතින වර්තමාන හදිසි අවස්ථාව, එක්සත් ජනපදය විසින් දැනට පවත්වාගෙන යන කුරිරු හා නීති විරෝධී සම්බාධක, ට්‍රම්ප් පරිපාලනය විසින් පනවා ඇති අතිරේක සම්බාධක 243 සහ කෝවිඩ් -19 වසංගතයේ බලපෑම්වල ප්‍රතිපලයකි.
විරෝධතාවන්ට ප්‍රතිචාර වශයෙන් කියුබානු ජනාධිපති මිගෙල් ඩයස්-කැනල්ගේ කැඳවීමකින් කියුබානුවන් දහස් ගණනක් පාරට බැස තම රජයට සහයෝගය දැක්වීමට හා විප්ලවය ආරක්ෂා කිරීමට කටයුතු කළහ.
දැන් එක්සත් ජනපදයේ දක්ෂිණාංශික, සම්බාධක ගැති, පවතින පාලන තන්ත්‍රයට හිතැති දේශපාලන කණ්ඩායම් තත්වය තවදුරටත් උග්‍ර කිරීමට උත්සාහ කරති. එහි ප්‍රතිපලයක් ලෙස, ඊනියා “මානුෂීය කොරිඩෝවක්” (එක්සත් ජනපද මැදිහත්වීම සඳහා අවශ්‍ය මුලික පියවරක් ලෙස) පිහිටුවීමට ඔවුන් ඉල්ලා තිබේ.
එවැනි මැදිහත් වීමවලට උත්සහයක් දැරීම පවා වංචනික සහ ලැජ්ජාසහගතය. එයට හේතුව ඔවුන් නියෝජනය කරන්නේ, ආහාර, ඉන්ධන සහ අවුෂධ හිඟයට ප්‍රදාන හේතු වී ඇති සම්බාදක ප්‍රතිපත්තිවලට වඩාත්ම සහය දක්වන පාර්ශවයන් වීමය.
කියුබානු ජනතාවගේ වර්තමාන අරගලයන්, මියාමි හි දැඩි මතධාරීන් කිහිප දෙනෙකුගේ දේශපාලන අරමුණු ඉටු කර ගැනීම සඳහා යොදා ගැනීම භයානක සහ අමානුෂික කටයුත්තකි. එය හරියට, ඔබ යමෙකුගේ ගෙල සිරකර මරා දැමීමට උත්සහ කරන විට ඔහු නිසි ලෙස හුස්ම නොගන්නා බවට යමෙකුට පැමිණිලි කිරීම වැනිය.
ඇත්ත වශයෙන්ම, එක්සත් ජනපද රාජ්‍ය දෙපාර්තමේන්තු 1960 දී සම්බාදක ක්‍රියාමාර්ග සාදරනිකරණය කිරීමට ඉදිරිපත් කළ පැහැදිලි කිරීම්වල සඳහන් අරමුණු ඉටුකර ගැනීම සඳහාම, සම්බාදක ක්‍රියාමාර්ග යොදාගෙන ඇත.
එම පැහැදිලි කිරීම්වල මෙසේ සඳහන්ව තිබුණි.
“රට අභ්‍යන්තරිකව තනිකිරීම අපේක්ෂා කළ හැකි එකම ක්‍රමය නම්, රට ආර්ථික වශයෙන් අතෘප්තියට හා දුෂ්කරතාවලට ලක් කිරීමයි… කියුබාවේ ආර්ථික ජීවිතය දුර්වල කිරීම සඳහා හැකි සෑම ක්‍රියාවක්ම වහාම කළ යුතුය… මුදල් හා සැපයුම් ප්‍රතික්ෂේප කිරීම, මුදල් හා වැටුප්වල මුර්ත වටිනාකම අඩු කිරීම, කුසගින්න ඇතිකිරීම වැනි ක්‍රියාමාර්ග, අපේක්ෂා භංගත්වය සහ රජය පෙරලා දැමීම වැනි දේ සඳහා විශාලතම බලපෑමක් කරන ක්‍රියාමාර්ගයන් වේ.”
එක්සත් ජනපදය “මානුෂීය හේතූන්” මුවාවෙන් ලොව පුරා රටවල් ගණනාවකට, (ලිබියාවේ සිට ඉරාකය දක්වා, චිලියේ සිට ග්‍රෙනාඩා දක්වා), මැදිහත් වීම් සිදුකර ඇත සහ ඒවායින් එම රටවලට බොහෝ දුරට විනාශකාරී ප්‍රතිපල අත් කර දී ඇත.
ඇත්ත වශයෙන්ම එක්සත් ජනපදය පසුගිය වසර 60ක කාලය තුළ කියුබාවේ විවිධ “මැදිහත්වීම්’ සඳහා ඩොලර් මිලියන ගණනක් දැනටමත් වියදම් කර ඇත. Bay of Pigs ආක්‍රමණය කිරීම, හෝටල් බෝම්බ හෙලීම්වලින් ජාත්‍යන්තර සංචාරකයින් ඝාතනය කිරීම, කුලී ප්‍රහාර තුළින් දහස් ගණනක් මරණයට පත්කිරීම සහ කියුබානු නායකයින් ඝාතනය කිරීමට වාර සිය ගණනක් උත්සාහ කිරීම එවැනි ක්‍රියාමාර්ග කිහිපයකි.
එක්සත් ජනපද “මැදිහත්වීම්” තුළින් ඉතිහාසය පුර මුදා හරින ලද මරණයේ හා විනාශයේ භාවිතාවන් දෙස විමසා බැලීමේදී, එවැනි ඕනෑම “මැදිහත්වීම”කට කරන ආරාධනාවකට සහාය දීමට පෙර ඕනෑම කෙනෙකුට දෙවරක් සිතීමට සැලැස්විය යුතුය.
ජුලි 14 වන දින මියාමි නගරාධිපති ෆ්‍රැන්සිස් සුවාරෙස්, කියුබාවට ගුවන් ප්‍රහාර එල්ල කරන ලෙස, ෆොක්ස් නිවුස් වෙත අදහස් දක්වමින් ඉල්ලා සිටියේය.
එසේම, ජෙනරාල් මැනුවෙල් නොරීගා නෙරපා දැමූ 1989 දී පැනමාව මත එක්සත් ජනපදය ආක්‍රමණය කිරීම උපුටා දක්වමින් ඔහු කියා සිටියේ, කියුබාවට එරෙහිව හමුදාමය ක්‍රියාමාර්ගයකට අවැසි කරන සන්ධානයක් අවශ්‍ය බවයි.
ඔහු උපුටා දැක්වූ ප්‍රහාරයේදී පුද්ගලයන් 2,000ත් 3,000ත් අතර සංඛ්‍යාවක් ඝාතනය වූ අතර එම මැදිහත්වීම එක්සත් ජාතීන්ගේ සංවිධානය විසින් ජාත්‍යන්තර නීතිය උල්ලංගනය කිරීමක් ලෙස පසුව හෙළා දකින ලදී.
මේ අතර මෑතකදී පැවතී සමාජවාදී ව්‍යාපාර සමූහයක ප්‍රකාශයකින්, බ්‍රිතාන්‍යයේ මන්ත්‍රීවරුන් 30 දෙනෙකු පැහැදිලි කර ඇත්තේ “එක්සත් ජනපදය වසර 60ක් තිස්සේ ඒකපාර්ශවිකව හා අමානුෂික පැනවූ සම්බාදක ඉවත් කිරීම, ඉක්මන් හා පහසුම මැදිහත් වීමක් වනු ඇති” බවයි.
බ්‍රිතාන්‍ය පාර්ලිමේන්තු මන්ත්‍රී Diane Abbott ට්විටර් පණිවිඩයක් ඔස්සේ මෙසේ සඳහන් කර ඇත. “ලෝකයේ අතිමහත් බහුතරයක් රටවල් සහ ජනතාව, කියුබාවට නීතිවිරෝධී ලෙස සම්බාදක පැනවීමට විරුද්ධ වෙති. සම්බාදක, කියුබාවේ සියලු ආර්ථික දුෂ්කරතාවලට හේතුවයි. එම දුෂ්කරතා කියුබානු ජනතාවට විසඳිය හැකිය. විදේශීය මැදිහත් වීමක් අවශ්‍ය නැත. සම්බාදක අවසන් කරන්න! ””
සම්බාදක අවසන් කිරීම වෙනුවෙන් බ්‍රිතාන්‍යය ඇතුළු රටවල් 184ක් ජුනි මාසයේදී එක්සත් ජාතීන්ගේ මහා මණ්ඩල සැසිවාරයේදී ඡන්දය ප්‍රකාශ කළ අතර, සම්බාදක තව දුරටත් පවත්වාගෙන යාම වෙනුවෙන් ඡන්දය ප්‍රකාශ කළේ එක්සත් ජනපදය හා ඊශ්‍රායලය පමණි.
සම්බාදකවල ප්‍රතිපල වඩාත් දරුණු වී ඇති පසුබිමක, ලොව පුරා බොහෝ රටවල් මෙන් කියුබාවද කොවිඩ් -19 රෝගීන්ගේ වැඩිවීම් අත්විඳිමින් සිටී.
මතන්සාස් වැනි සමහර නගරවල රෝගය දරුණු ලෙස පැතිර යන අතර රෝහල්වල සහ හුදකලා මධ්‍යස්ථානවල ධාරිතාවය උපරිම සීමාව දක්වා විහිදී තිබේ.
තත්වය බරපතල වුවත්, එක්සත් ජනපදය ඇතුළු කලාපයේ අනෙකුත් බොහෝ රටවල සිදුවීම් හා මරණ සංඛ්‍යාවට සාපේක්ෂව කියුබාවේ මරණ සංඛ්‍යාව බෙහෙවින් අඩු බව සැලකිල්ලට ගැනීම වැදගත්ය. ජූලි 10 වනවිට එක්සත් ජනපදයේ එය මිලියනයකට 1,870 ක් විය, කියුබාවේ මිලියනයකට 139කි.
කොවිඩ් – 19 ආරම්භ වීමත් සමඟ කියුබාවට ජාත්‍යන්තර සංචාරක කර්මාන්තයෙන් ලැබෙමින් තිබු ආදායමද අහිමි වී ඇති අතර එය 2021 මුල් මාස හතර තුළ 94%කින් පහත වැටී තිබේ.
පසුගිය වසරේ එක්සත් ජනපද සම්බාදක විසින්, පරීක්ෂණ උපකරණ ඇතුළු කොවිඩ් – 19 වෛද්‍ය ආධාර තොගයක් පවා ලබා දීම වැළැක්වීය.
තම රට තුළ නිෂ්පාදනය කළ එන්නත් දෙකක් තිබුණද, සම්බාදකවල සෘජු ප්‍රතිපලයක් ලෙස සිරින්ජ සහ අමුද්‍රව්‍ය නොමැතිකම කියුබාවේ එන්නත් කිරීමේ වැඩසටහනට බාධාවක් වී ඇත.
සම්බාදක ක්‍රියාමාර්ග හේතුවෙන් ලොව පුරා සහයෝගීතා සංවිධාන විසින් කොවිඩ් – 19 වෛද්‍ය ආධාර සඳහා මුදල් රැස් කරන වෙබ් අඩවි පවා වසා දමා ඇත.
කියුබාවේ මිතුරන්ට සහ පවුලේ අයට මුදල් මාරු කිරීමට ක්‍රමයක් සොයාගත නොහැකි පුද්ගලයින්ගෙන්, කියුබාවේ සහයෝගිතා ව්‍යාපාරයට බොහෝ විමසීම් ලැබෙමින් පවතී.
කියුබාව සඳහා Covid – 19 හදිසි ඉල්ලීම් මත, කියුබාවේ සහයෝගිතා ව්‍යාපාරයේ (CSC) සාමාජිකයින්, අනුබද්ධ ආයතන සහ ආධාරකරුවන් මේ වනවිටත් ඩොලර් 80,000ක් රැස් කර ගෙන ඇත.
ජනාධිපති ජෝ බයිඩන්ට එක්සත් ජනපද සම්බාදක අත්හිටුවීමට හෝ ඇත්ත වශයෙන්ම අවසන් කිරීමට හැකිය. කියුබානු – ඇමරිකානු පවුල්වලට කියුබාවට යැවිය හැකි ප්‍රේෂණ සඳහා එක්සත් ජනපද සීමාවන් ලිහිල් කිරීමට ඔහුට හැකිය.
ඒ වෙනුවට, මෑතදී පැවති එක්සත් ජනපද මැතිවරණයේදී ට්‍රම්ප්ට ෆ්ලොරිඩා ඡන්දය ලබා දුන් මියාමි මැර පිරිස උසාවියට ඉදිරිපත් කිරීමට බයිඩෙන් කැමැත්තක් දක්වයි. එයින් පෙන්නුම් කරන්නේ, පසුගිය අවුරුදු 60ක අසාර්ථක සීතල යුද ප්‍රතිපත්ති වෙත ආපසු යාමට ඔහුගේ ඇති උනන්දුවයි.
ඉරිදා විරෝධතා හමුවේ, ඔහුගේ තනතුරේ කුහකකම සහ අනවබෝධය හුවා දක්වමින්, බයිඩන් මෙසේ පැවසීය: “අපි කියුබානු ජනතාව සමඟ සිටිමු. වසංගතයේ ඛේදජනක ග්‍රහණයෙන් සහ කියුබාවේ අධිකාරීවාදී තන්ත්‍රය විසින් ඔවුන්ට යටත් කර ඇති දශක ගණනාවක මර්දනය හා ආර්ථික දුක් වේදනාවලින් නිදහස සහ සහනය ඉල්ලා සිටිමු.”
කියුබාව, එක්සත් ජනපද රජය විසින් දශක හයක ආර්ථික යුද්ධ හමුවේ ඇදහිය නොහැකි තරම් ඔරොත්තු දීමක් පෙන්නුම් කර තිබේ.
සියළුම පුරවැසියන් සඳහා බෙහෙවින් ප්‍රශංසනීය හා ආකර්ෂණීය සෞඛ්‍ය, අධ්‍යාපනය සහ සමාජ සත්කාර සහිත සමාජයක් ගොඩනැගීම සඳහා ඔවුන් සියලු දුෂ්කරතාවන්ට එරෙහිව වෙහෙස නොබලා කටයුතු කර ඇත.
කියුබාව සැබවින්ම ප්‍රාතිහාර්යයක් වන අතර එය ආරක්ෂා කිරීම වටී. මෙතරම් සම්බාදක තිබියදීත් කියුබානුවන් මෙතරම් ශක්තිමත්ව සිටී නම්, සම්බාදක නොමැති තත්වයක් තුළ ඔවුන් කෙතරම් ජයග්‍රහණ තම සමාජයට අත්කර දේවිද යන්න කෙනෙකුට සිතාගත හැක.
www.lankatruth.com
